06.06.2023
Ўзбекистон Республикаси Президенти Шавкат Мирзиёев 6 июнь куни Самарқанд шаҳрида Халқаро валюта фонди бошқарувчи директори Кристалина Георгиевани қабул қилди.
Ўзбекистон билан Халқаро валюта фонди ўртасидаги кўп қиррали ҳамкорликни, жумладан, макроиқтисодий барқарорликни таъминлаш, пул-кредит ва фискал сиёсатни такомиллаштириш борасидаги ислоҳотлар каби устувор йўналишларда янада ривожлантириш масалалари муҳокама қилинди.
Кейинги йилларда ХВФ билан ҳамкорлик сезиларли даражада фаоллашгани мамнуният билан қайд этилди. Бу даврда фонднинг 70 дан ортиқ миссияси Ўзбекистонда бўлди, эксперт-техник кўмак кенгайиб бормоқда.
ХВФ раҳбари Кристалина Георгиева Янги Ўзбекистондаги ортга қайтмас ислоҳотлар дастурини тўлиқ қўллаб-қувватлади ҳамда унинг амалга оширилишига бундан буён ҳам кўмаклашишига тайёрлигини билдирди.
Глобал иқтисодиёт ва барқарор тараққиётга оид долзарб масалалар юзасидан ҳам фикр алмашилди.
Шу билан Ўзбекистон Президентининг Самарқандга ташрифи якунланди, давлатимиз раҳбари Тошкентга қайтиб келди.
Маълумотлардан фойдаланилганда www.president.uz га ҳавола кўрсатилиши шарт
© 2025 Ўзбекистон Республикаси Президентининг расмий веб-сайти
Барча ҳуқуқлар ҳимояланган
Диққат! Агар сиз матнда хатоликларни аниқласангиз, уларни белгилаб, маъмуриятни хабардор қилиш учун Ctrl+Enter тугмаларини босинг
